Kıyivde Rusiye ücüminden bir ABD vatandaşı elâk oldı, 40-tan ziyade insan yaralandı, dep bildirdi şeer başı Vitaliy Kliçko.
"Duşmannıñ kütleviy ücümi neticesinde paytahtta 40-tan ziyade insan zarar kördi. Olarnıñ 30-dan ziyadesi hastahanege alındı. Bir adam, ABD vatandaşı, ücüm vaqtında elâk oldı", — dep yazdı o Telegramda.
O şunı da qoştı ki, Soloma rayonında mesken evniñ kirişi yıqılğan, anda viranelerniñ temizlenmesi devam ete.
KŞAM Rusiye ücüminiñ aqibetlerini eñ azdan 12 yerde qayd etti: Kıyivniñ Soloma, Svâtoşın, Darnıtsâ, Dnipro, Podol ve Obolon rayonlarında.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
