Rusiye bazarertesi künü Ukrayinağa elâk olğan daa 1245 Ukrayina arbiyiniñ cesedini berdi. Bu aqta Ukrayina cenk esirlerine yanaşuv meseleleri koordinatsion ştabı bildirdi.
Ştab haberinde aytılğanına köre, iyünniñ 16-nda iyünniñ 2-nde İstanbulda Rusiye ve Ukrayina arasında tizilgen añlaşmalar çerçivesinde ceset qaytarıluvınıñ soñki etapı oldı. Umumen Ukrayina 6057 insannıñ cesedini aldı. Ştab haberinde qayd etilgenine köre, olarnıñ identifikatsiyası yapılacaq.
Muzakerelerde Rusiye eyyetiniñ yolbaşçısı Vladimir Medinskiy «Rusiye İstanbulda bergen sözlerini tuttı», dep yazdı. Onıñ malümatına köre, Ukrayinağa Ukrayina Silâlı quvetlerinde çalışqan 6060 zabit ve askerlerniñ cesedleri berildi, Rusiye ise elâk olğan 78 arbiyiniñ cesedini aldı. Daa evel 27 ceset aqqında aytılğan edi. Ukrayinna tarafı Rusiyege bergen ceset sayısını aydınlatmadı.
İstanbuldaki muzakerelerden soñ Rusiye tarafı Ukrayinağa elâk olğan 6 biñ arbiyniñ cesedini bermege, ve Ukrayinada Rusiye arbiyleriniñ cesetlerini qabul etmege azır, dep bildirgen edi, amma sayısı aydınlatılmadı.
Keçken afta Rusiye vekilleri Ukrayina cesetlerni qaytaruv esnasını soza, dep bildirdi. Kyiv ise añlaşmalar cesetlerniñ berilüvi salı künü, iyünniñ 10-nda başlaycaq, dep belgilegen edi, dep bildirdi. Öyle de oldı.
Keçken afta cenk esirleri de deñiştirildi. Umumen dört deñişüv oldı. Deñişüvler 1:1 olaraq keçe, lâkin almaştırılğan esirlerniñ tam sayısı şimdilik aytılmay. Deñişüvler eñ az kelecek aftağa qadar devam etecek, dep beklenile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
