«Sarı şerit» faalleri işğal etilgen Qırım şeerlerinde yañı tirenüv timsallerini tarqattı. Aqmescit, Aqyar ve Yaltada yazuvlı şiar, stiker ve leyhalar peyda oldı. Bu aqta areket Telegram kanalında haber ete.
«İşğalde insanlar tirenüv timsallerini körip, bir özleri olmağanını, yanlarında olar kibi işğal bitmesini beklegenler bar olğanını añlay», – dep aytıla haberde.
Faaller Rusiyeniñ «birlik» propagandasına baqmadan, bu tirenüv timsalleri Qırım Ukrayina olğanına ümüt bere ve hatırlata, dep qayd ete.
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.